Ukiut marluk ingerlanerini ingerlariaqqiffiusumik ilinniarnermik aallartitsisimasut ikinnerusut
Ilinniarnertuunngorniarneq ingerlariaqqiffiusumik ilinniakkanut ingerlaqqinnissamut pingaarnertut piareersarfiuvoq, soorlu ingerlariaqqiffiusumik ilinniakkanut naatsunut -, bachelorinngorniarnernut -, professionsbachelorinngorniarnernut kiisalu kandidatinngorniarnernut. Kisitsisini paasissutissani matumani ilinniarnertuunngorniarnermi ukiunik pingasunik sivisussuseqartumi nalunaarsuutit kisimik suliarineqarput.
Ilinniartut 2019-imi ilinniarnertuunngorniarnermik naammassinnissimasut 43 pct.-ii ukiut marluk ingerlanerini ingerlariaqqiffiusumik ilinniarnermik aallartitsisimapput. Tamanna ukiup siuliani naammassinnissimasunut naleqqiullugu 5 pct. point-inik appariarneruvoq. Ukiulli tulleriinni 2008-2015 akornanni annertussusaat appariartorsimavoq, 2015-2018-imi qaffariarsimalluni, 2008-2019-illu iluani ilinniarnertuunngorsimasunut naleqqiullugit 32 pct. point-inik appariarsimallutik, tassani ilinniartut ukiut marluk ingerlanerini ingerlariaqqiffiusumik ilinniarnermik aallartitsisimasut 75 pct.-iummata.
2019-imi ilinniarnertuunngorsimasut 17 pct.-ii inuussutissarsiornermi ilinniakkanut ingerlaqqissimapput. Ataatsimullu isingalugu 2008-miit 2019-imut ilinniarnertuunngorsimasut ukiut marluk ingerlanerini ingerlariaqqiffiusumik imaluunniit inuussutissarsiornermi ilinniarnermik aallartitsisimasut 80 pct.-iniit 60 pct.-imut appariarsimapput.
Titartagaq 1: Ilinniarnertuut ukiut marluk ingerlanerini ingerlariaqqiffiusumik imaluunniit inuussutissarsiornermi ilinniakkamik aallartitsisimasut annertussusaat, 2003-miit 2019-imut
Nalunaarut: Ilinniarnertuunngorniarneq ukiunik pingasunik sivisussuseqartoq kisimi pineqarpoq.
Najoqqutaq: Naatsorsueqqissaartarfik- Kisitsisaataasivimmi kisitsisit takukkit (https://bank.stat.gl/UDNTRGU1).
Ingerlariaqqiffiusumik ilinniakkani aallartitsisartut annertussusiisa appariarnerat ilinniarnertuunngortut amerlassusaannut naleqqiullugu naatsorsorneqassaaq. Piffissami 2014-imiit 2019-imut ilinniarnertuunngorniarnermik ukiunik pingasunik sivisussuseqartumik naammassinnissimasut amerlassusaat 18 pct.-inik apparsimapput, ingerlariaqqiffiusumilli ilinniarnermik aallartitsisimasut piffissami pineqartumi aallartitsisimasut 24 pct.-inik apparsimallutik.
Titartagaq 2: Ilinniarnertuut amerlassusaat, 2003-miit 2019-imut
Nalunaarut: Ilinniarnertuunngorniarneq ukiunik pingasunik sivisussuseqartoq kisimi pineqarpoq.
Najoqqutaq: Naatsorsueqqissaartarfik- Kisitsisaataasivimmi kisitsisit takukkit (https://bank.stat.gl/UDNTRGU1).
Suiaassutsit malillugit ingerlaqqittarnerit annertussusaat
Arnat angutinit amerlanerusut ilinniarnertuunngorniarnermik aallartitsisarput, naammassinnittarlutillu. Nalinginnaasumillu aamma arnat amerlanersaat ingerlariaqqiffiusumik ilinniarnermik aallartitsisarput. Ukiunili kingullerni tamanna allanngorsimavoq, 2017-imi ilinniarnertuunngorsimasuni ingerlariaqqiffiusumillu ilinniarnermik aallartitsisimasuni angutit amerlassusaat annertunerulaarmata. 2018-imi 2019-imilu ilinniarnertuunngorsimasut akornanni ingerlaqqiffiusumik ilinnialersimasut arnat amerlanerupput.
Titartagaq 3: Ilinniarnertuut ukiut marluk ingerlanerini ingerlariaqqiffiusumik ilinniarnermik aallartitsisimasut suiaassusaat malillugu, 2003-miit 2019-imut
Nalunaarut: Ilinniarnertuunngorniarneq ukiunik pingasunik sivisussuseqartoq kisimi pineqarpoq.
Najoqqutaq: Naatsorsueqqissaartarfik- Kisitsisaataasivimmi kisitsisit takukkit (https://bank.stat.gl/UDNTRGU2).
Ilinniarnertuunngorniarfiit
Ilinniarnertuut qanoq amerlatigisut ingerlariaqqiffiusumik ilinniakkanut ingerlaqqittartut ilinniarnertuutut naammassiffigisimasaat malillugit assigiinngitsorujussuupput. 2019-imi ilinniartuunngorsimasut akornanni GUX Nuummi naammassinnissimasut ukiullu marluk ingerlanerini ingerlariaqqiffiusumik ilinniarnermik aallartitsisimasut 43 pct.-iupput, GUX Qaqortumilu 23 pct.-iulluni. Atuarfiilli isigissagaanni ilinniarnertuunngortut ikipput, ukiumi naammassiffiusumi ilinniarnertuunngortoq 1-2 pct.-inik annertussuseqarmat. Taamaattumik piffissap ingerlanerani ilinniakkanut ingerlaqqittartut annertuumik allanngorarsinnaapput.
Titartagaq 4: Ilinniarnertuut ukiut marluk ingerlanerini ingerlariaqqiffiusumik ilinniarnermik aallartitsisimasut amerlassusaat ilinniarnertuunngorfik malillugu, 2014-imiit 2019-imut
Nalunaarut: Ilinniarnertuunngorniarneq ukiunik pingasunik sivisussuseqartoq kisimi pineqarpoq.
Nalunaarut: Ilinniarnertuunngortut ikittuinnaanerat peqqutaalluni ilinniartoq ataaseq 1-2 pct.-inut naatsorsorneqarpoq. Taamaattumik piffissani ilinniarnernut ingerlaqqiffiusuni amerlassutsit ilaasa allanngorarnerat ilinniarnertuunngortut ikittuinnaanerannik tunngaveqarsinnaavoq.
Najoqqutaq: Naatsorsueqqissaartarfik- Kisitsisaataasivimmi kisitsisit takukkit (https://bank.stat.gl/UDNTRGU1).